نوبة شعر جميلة وحلوة تدخل فيها تقطع وقتك
تتلهي فيها وتنسى مشاكل
وتعرف شكلك
اللي ما شكلك زيه اتنين
تعرف تقرا
وتسمع فكرة
بس اوعاك تعملها يا بيه
وتحط دماغك على خدك
وتبدأ نوبة من الأفكار
يبقى وصلت يا باشا
أخيرا وشرفت في آخر المشوار
يا الخانكة يا ابو زعبل دوغري
يا اما يا روحي في لا ظوغلي
واوعي تقرب للترماي
وان شافك حد وبتفكر
تف الفكرة بسرعة
ولف
حوالين نفسك
مرة
ونف
واعمل انك عندك برد
تبقى خلصت
واوعاك مرة تانية تفكر الا نعيد من الاول تاني
ونرجع
تاني ونلف
بدأت فصول المسخرة
بدأت فصول المسخرة
والكف جايلك من وره
اعدل قفاك دا كوهين وجاك
جايين معاهم مقدرة
هيخلوا دمك دندره***
يا للي انت بتحارب أخوك
وتبيع ميراث جدك وأبوك
ياللي العدا بيطمعوك
إنك هتصبح مفخره
الكف مش جاي من أخوك الكف جايلك من وره****
خدعوك ياخويا وقرطسوك
بلجام قطيفة بيركبوك
مدفع وطوبة سيبوك
وادوك صابونة معطرة
ومعاها حتة سكره
والكف جايلك من وره****
ياللي نسيت عهد الجدود
وآمنت بالزيف والحدود
دمك هينشف م الوعود
اللي بتطرح منظره
تتلهى تسأل إيه جرا
والكف جايلك من وره
ليست هناك تعليقات:
إرسال تعليق