بكرة عيد ميلادي
فكرتوا حتجبولي ايه؟
بكره يبقى تقص من عمري سنة
عارفين ليه؟
لأنه بعرف الدنيا زاد سنة
لكنه قلل من عمري المكتوب سنة
سنين ورا سنين
اتغيرت فيهم حاجات كتير
البيت القديم
والشارع الواسع ضاق
والناس الطيبيين منهم اللي عايش ومنهم اللي مات
السنة دي غير كل سنة
السنة دي انا عملت فيها حاجة كويسة
ممكن تخليني احس بفخر
ومش حقولها طبعا
لحسن حد يحسدني عليها
عرفت حاجات كتير
واتأكدت أن الناس ما فيش في دماغها اللي المناصب والفلوس
يعني يا تبقي وزير
يا تبقي ملياردير
وعششت الفكرة دي في يافوخي
وفهمت نفسي أني فاهمة الدنيا والناس كويس ومش ممكن انجرح من حد
مهما كان السبب
وكنت أغبى انسانة
في سني ده
اتخدع
واغلط
واتهزأ
ويلعب بيا شوية ناس الكورة
اه يا دنيا مغرورة
الفاشل فيكي موهوب
والحرامي فيكي حدق
والشريف أصبح عبيط
والواطي طلع فوق
يبقى انا لازم افوق
ومناسبة يوم ميلادي دي حلوة قوي علشان افوق
عموما انا مش بحتفل بيه كل سنة زي الناس ولا حاجة
لأن الاحتفال بيوم الميلاد حرام
بالشكل اللي احنا بنشوفة دا
لكن ممكن قوي
نصوم ونشكر المولى لأنه أمهلنا سنة كمان
عموما
انا نفسي في قطة
ممكن حد يجيبلي قطة شكلهاحلو
طب بلاش كاميرا فيديو ؟
ايه البخل دا
دا اديا اتقورت وانا بنقر على الكي بوورد في السقعة دي
خلوا عندكم دم وهاتولي قطة بقى
عموما
لو بكره ما جاش مش عارفة حيكون ايه موقفى
فاكرين اغنية رونان كيتن زمان
اف تمورو نفر كم ؟
لو بكره ما جاش ابدا
حتعرف ازاي اني بحبها
أمي طبعا
الوحيدة اللي في الدنيا بشتاق لها
وبحب اشوفها
واحب ضحكتها ...وضيها
ليها ضي لما بتضحك ولا تقرب عليا
وتاخدني في حضنها
بحبها
بجد
وبموت فيها
أمي اللي اعدت تولد فيها من الثلاثاء للجمعة
يبقى تستاهل تكون ست الحبايب ولا لا؟
اسالكم بق الدعوة ليها بصحة وعافية
ويخليها ليا
ويغفرلنا اجمعين
ويعفو عنا
اللهم آمين
و الحمد لله رب العالمين
