مرحبا

مدونتي هى انعكاس حالتي المزاجية همومي واحلامي التي لم تظهر للنور بعد
هواياتي ، دموعي التي أخشى أن يراها الآخرون
معاناتي مع نفسي ومع الاخرين




هل لا نزل نفتؤا نذكر فلسطين والعراق والمستضعفين في الأرض من المسلمين؟

حتى لا ننسى في زحمة الحياة..

الأحد، ١٩ أكتوبر ٢٠٠٨

سوزان تميم ....


حسبي الله ونعم الوكيل دلوقتي يا هشام؟؟؟؟؟
طب عن فين حسبي الله ونعم الوكيل قبل كده؟
كن فين شجبك واعتراضك على الزج بناس كتييييييييييير قوووووووووووووي ابرياء من غيروجه حق في السجون؟
الدور ببساطة كده جه عليك؟

كان فين حسبي الله ونعم الوكيل والعبارة بتاعت ممدوح اسماعيل بتغرق؟
لو كنت وقفت معانا يومها كان الناس وقفوا معاك النهاردة وقالوها بصوت مسموع ....
حسبى الله ونعم الوكيل....
احنا لا نجرم احد ما دام القضاء لم يقل كلمته بعد ...ولو أن المهزلة القضائية في بلدنا باتت تفوح رائحتها ...
لكن هشام طلعت مصطفى بريء حتى تثبت إدانته في المحكمة...زي ممدوح اسماعيل كده...
وخليني اقولك كلمة حلوة ....
يا هشام باشا ....
واخد على أكل المطاعم وبالشوك والسكاكين ...أيه اللي رماه على الرمرمة من على عربية فول في حارة ؟
اهو آخرة الرمرمة وحشه وجابتله التهاب في كل حته في جسمه
وكان أخرته وحشه ...
مسخرة قوي بلدنا دي يا جدع ....
واللي اتفرج على حلقة الحقيقة وائل الإبراشي وطلعت السادات
حيفهم أنها بقت مسخرة والناس فقدت الثقة بالحكومة ويمكن يترحموا على ايام الخديوية والملكية ..
أما المسخرة فهي /
1- هو طلعت السادات مش خايف ليه ؟ طب ليه هو بالذات اللي بترافع في قضايا الرأي العام؟ طب هو سايبينه ليه؟
2-هو طلعت السادات مسنود من مين عشان كده محدش عارف يسمه ولا يخبطه بعربية ولا يطفى النور عليه وبعدها ورا الشمس عدل؟
3- طب هو فين محمد بتاع بني مزار يشيل ليلة دا كلام طلعت ذات نفسه؟ طب صحيح هو مين اللي عمل العملة السودة الي معملهاش محمد؟
4- طب ليه محدش عرف بقضية اخو سوزان تميم الا اليومين دول؟
5- طب هو هشام عمل ايه عشان يبهدلوه كده؟
6- طيب ليه معملهوش زي دوحة؟و هربوه برة البلد؟
7- طب هو لما واحد زي عم هشام واصل يحب واحدة يطلقها من جوزها عيني عينك كده ويجبره على الطلاق ؟يعني لو واحد باشا حب بنت اوغلي واخد كلاف عن حظرتنا يعمل فيه زي ما اتعمل في عادل معتوق؟
8- طيب هي مرت مين في التنين العراقي ؟ ولا معتوق؟
9- طيب تفتكروا هشام حياخد براءة من أول مرة ولا بعد كام جلسة يكون الناس نسيت ؟
10- طيب تفتكروا ايه السبب اللي حيخلي الناس والرأي العام ينشغل؟ البنزين /العيش/ الأزمة المالية/اختفاء شاي كده؟
11- طيب تفتكروا مين اللي حيشيل اليلة : معتوق/ولا العراقي... ولا أكونش أنا اللي قتلت سوزان تميم ؟
12- سؤال أخير : هو لما فندق سان استيفانو اتباع اتعملت مناقصة لبيعه؟
طب اللي عنده نسخة من الTender Docs ممن يبعتهالي ؟
13-سؤال مالهوش دعوة بالموضوع: هو فين المناقصة اللي اتعملت عشان رصف طرق اسكندرية ؟
14- نفس سؤال 12 بس زود عليه هو جلسة فتح المظاريف كانت سرية؟ واشمعني الشركة المقندلة دي اللي رسي عليها العطا ؟واسم الشركة دي ايه؟ لأني مش لاقيالها لوحات آسف للانزعاج ؟

الخميس، ٩ أكتوبر ٢٠٠٨

أم سمية وكوبري وكوبرياية

أم سمية قبل ما تبقى أم سمية كان اسمها اييييييه؟،،،،،
طب كوبرياية وعرفت اسمها : على اسمي وكوبري اسمه ايه ؟ ،،،،،،،،،،،،،

طبعا من المعلوم ومن المعروف أن في كل كلية شئون طلبة ...صح؟ وانا لسه وارد جديد، دخلت على المبني القبلي يا معلم ، وعينك ما تشوف إلا طوابير طويلة ...وبما أني دايما محظوظة فقد اصدر رئيس الكلية (هو كان مين وقتها؟)
قرار بتحويلنا إلى الخلف ....
ولمن لا يعرف خلف كلية آداب ده يطلع في وش كلية التربية بالضبط حته كده كان زي جراج وممر ما بين الكليتين
الطلبة الفائدة تزوغ (أنا مش منهم طبعا)وتقعد تحب هناك ....
ولأني واد حشري ولساني زالف وكان أزلف من كده وقت الكوليدج..فكان ولا بد أضرب صحوبية مع طوب الأرض ...م أنا قعدت حوالي اسبوع كل ما أحاول أقدم تظهر الرسالة الموقرة ...عفوا الساعة الواحدة فوووووووووووت علينا بكرة
من ضمن من تعرفت عليهم ...أم سمية ...سمسمة قلبي ...وصديقتي اللدود ....
المهم تم بحمد الله وعونة التقديم
منوسي عاوز يدخل فوناتيكس....القسم قفل يعني ايه القسم قفل؟
يعني استكفى أعداد؟
وانا اللي كنت ملطوعة في الرابع في فوناتكس وعمالة اتعرف على العيال بتوع الفرقة الرابعة؟
والحل؟
اعملي التماس لدي العميد....
طلعت مشمرتا عن أنيابي ومكشرة ما بين حاجبي أو حاجة زي كده مش فاكرة بالضبط كان شكلي ايه ...
المهم ...وانا بحاول فشلا أدخل للعميد لقيتلك بنت أمووووووووووووووورة بكل التصورات ...لأ بجد
وماسكة حتة شنطة ...زمانها اتقطعت طبعاً ...دا أنا عيني كانت حتطلع عليها ...والقمر دا بتقولي ان ليها واسطة والعميد حيدخلها آثار
وبما أن المكتوب والمهروب لا بد من إنفاذه فقد نفذ قدري علي ودخلت قسم تاريخ ....
وأنا داخلة لقيت مين
شوطار...طبعا أم سمية ..بس المصيبة أني ما كنتش عارفاها ..قالتلي انا ....!

وتطايرت الأيام من الروزنامة
وقال لها بحبك يا منيلة على عينك
قالتله ريحك شرابك ...هي اللي دهولتني على عيني
ليت الشراب يعود يوما مغسولا كأنه جديدُ
حتة مالهاش دعوة بالموضوع فوتوها
عموما أيام تشيلني وأيام تحطني
ولأن موضوع كوبري هو موضوع حلقتنا النهاردة...
فمعانا اتصال تليفوني : آلووووووووووووووووووووووو
دي المزيعة أم كتف وكتف لأ...
ممكن نعرف مين كوبري دا؟
طب نتعرف الأول ...وتقولي ايه رأيك في اللي انا لابساه قصدي في البرنامج
دي المذيعة 2 اللي لابسه بادي من غير لا حمالة ولا يحزنون
أنا متغاظة من الاتنين
كوبري هو اكتبي ورايا يا بنت انتي وهوا
واد زي القمر طول بعرض بارتفاع حاجة كده زي الظبابيط الجداد...لأ دول معصعصين ...حاجة طول زي مهند
وعرض نبيل الحلفاوي...وبياض وحمار وحلاوة ..
وضارب جاكت اسود على بنطلون جينز ..قشدة وأخوكو منوسي... أخوكوا ايه الاا اتفهم غلط
اختكوا منوسي كان قبل ربنا ما يكرمنا ويكرمكوا كده وكان عنيها تندب فيها 2000000000000000000رصاصة
الواد كان بيحب البت
يوووووه لأ مش عنوان الحلقة اللي ودت عمرو خالد في داهية
هو فعلا كان بيحبها لدرجة اني كنت بتمنى انهم يكونوا اتجوزوا بعدد كده...كنت اطلع انا وسمسمة وأم أحمد (مش يتاعت الجبنة) مبني المكتبة ولأن الدور الأول فااااااااضي وما فيهوش حاجة ..وكانت قعدتنا المفضلة هناك ..أمام التويفل سنتر اللي كان بعلم الأجانب عربي
الواد كل يوم ياخدها ويطلع الدور التالث واحنا هاتك يا رزالة ...طالعين نازلين ما احنا تلات بنات وهما كابلز
وهاتك يا يا ايه ؟. معرفش هي حاجة ما بين المعاكسة والغلاسة والنفسنة ....
المهم أن احنا ضربنا صحوبية معاه غير معلنة من نوعية أنا معدية معايا دبدوب هدية في عيد ميلادي ...من صاحبتي والله واسمها مي....أبوها محامي يا خفيف منك له.....يقوم هو يقول كل سنة وانتي طيبة على الطاير كده
بس أحلى حاجة في كوبري أنه كان بيزنبها ....يعني مرة طلعنا لقيناه مخلي وشها في الحيطة وهاتك يا بستفه بس الحق عمري ما سمعت صوته ولا صوتها كأنهم كاناريا بيوشوشو بعض ...
هو احنا ليه كنا مسمينهم كدا لأني هو كان غاوي يطلع الكوبري اللي في التالت ويقعد هو وهي هناك
بس
ودي كانت حكاية كوبري وكوبرياية ....
بس مقولتليش ايه رأيك برضه في البادي؟
طاااااااااااااااااخ طرارررررررررراخ بووووم كاااااااااااااات صوت الضرب أنا بضرب المذيعة ام بادي...
المخرج بيقول كاااااااااات أنزل بالاعلان
...


ملحوسة على رأي آبي ....كفاية كده مذكرات أحسن حاسة أن الناس بطلت تدخل مدونتي

الأحد، ٥ أكتوبر ٢٠٠٨

أخت هيثم شكري ، تمانين في الميه،،،،،،،

سنة تانية ثانوي وبعد الامتحانات كنت انتظر التيجة كتطور طبيعي للحاجة الساقعة ، في نفس ذات الوقت أخت هيثم شكري كانت في 3ثانوي،، عم منوسي قاعد يحلم ، النتيجة جت لأخت هيثم شكري، 80% برافو يا اخت هيثم ،،، شاطرة ،، أخت عكروت ؟؟؟؟؟؟؟67% !!!!!!!!!!!!!!!!!!!!!!!!!!!!!!!!!!!!!!!!!!
أن أن آآآآآآآآآآآآآآآآآآآآآآآآآآآآآآآآآآآآآآآآآآآآآآآآن
دي صوت الصدمة لو ن الصدمة لها صوت ...
هكذا كان الصدمة الكبيرة والقفا المحترم اللي اخده منوسي في بداية حياتة
ما فيش قدامك غير التحسين يا ابو المننانيس
وقد كان ،،،،
ومرت الأيام وتطايرت أوراق الروزنامة بفرحها وحزنها وجاءت بطاقة التشريح،،،
ايون محدش قرا الكلمة غلط مش دي البطاقة اللي بتقسمنا في الدنيا بعد كده شرايح ولا شرايح البرتقال تحت ايدي الشيف اسامة اطيب
وابقى انا حضرة المحترم وانت حضرة المتهم أبي؟
يومها فاكرة ان جاللي آداب انتساب ، يا ويح المنوسي ، يا ويح قبيلة المنانيس، من أين جاء هذا المنوس الفاشل، كيف تخطى حاجز دولة المنانيس العظمى ؟
عموما دخل منوسي ابن ام منوسي آداب انتساب وكان له رحلة مع التقديم أمال .. مش آداب التخصص فيه من سنة أولى ....
انتظرونا...
الحلقة القادمة ...أم سمية وكوبري وكوبرياية....

الخميس، ٢ أكتوبر ٢٠٠٨

تحسين ...تحسين....

تحسين دا طبعاً مش أسم أبداً ...لكن فعل من حسن أحسن تحسيناً وهو نظام الثانوية العامة أيام عمكو منوسي،،،،،،



أين كنا؟ نعم عند الامتحان...وعند الامتحان تظهر قدرات الأطباء من أمثالي....ولأني د.من يومي وفطين عبد الوهاب وزكي رستم وكل من له علاقة بالذكاء( فيما عدا منى ذكي طبعاً مش ناقصة...)فقد أخذت احاول أن أتحسس طريقي في ظلمات المناهج ... ولأني عنيدة فقد رفضت تماماً الدروس الخصوصية ..فهي مصاريف ع الفاضي ....

كنت أدرس في ذلك الوقت ...أحياء وكمياء وجيولوجيا كمادة أدبي بالاضافة إلى اللغات الانجليزية والفرنسية والعربية...

ولأني منوسي ضليع في اللغة الفرنسية ولأنه أخل بالاتفاق الغير معلن بمقاطعة الدروس الخصوصية مقاطعة البضائع الامريكية وأخد درس كيمياء فقد أبشر منوسي خيرا بما هو آت ....



عبقرية الفرنساوي والكمياء ....ومهزلة الحياء

انك تاخد على قفاك في قسم المنتزة عادي ..ولما يكون اللي بيديك القفا العباسي دا سيادة المخبر أو حضرة أمين الشرطة أو معالي وزير القسم حضرة الباشا النوباتجي يبقى أنعم وأكرم وحللت أهلا وتورم قفاك سهلا،،،

أما أن يكون القفا من الحياء فهو دا اللي مش ممكن ابدا ولا أفكر فيه ..القفا المرة دي جاي من الحياء والكمياء والفرنساوي ..

قفا محترم ...أنا قلت قبل سابق اني مش بحب الفرنساوي بكرهه...لكني كنت بحب الكيماء والأحياء والجيولوجيا وكنت أوائل طلبة فبها والله...

الامتاحنات جت ومنوسي مفكر نفسه يا مهنا ياما هناك....وإذ بي أفاجأ أن الامتحانات سودة أسود من أيامنا دلوقتي الفرنساوي رغم انه كان سهل الا ان العقريبة المنوسية لم تناسبها هذه الامتحانات التافهة...
أما الأحياء فكان نصيبي منها غريب مش عارفة لحد دلوقتي مين اللي قال ان DNA كان مقرر علينا....
خلصت الامتحانات ويوم النتيجة ....كان يوم
وللحديث بقية....

دعاء المحراب