اديني الوصلة بسرعة ارجوك محتاج الجرعة ..........

يا ألف بركة علي قطع خط النت ...

خير ان شاء الله...

قطع النت خير وزرغت يا اللي انت مش نتاوي ....

وزرغووووووووووطة كبيرة عشان عصفور ولا تزعل احنا عندياتنا كام عصفور يعني ...

وزرغوتة مسرسعة ..لشكلي الرائع وقت وقوع الصدمة علي...

يوم انقطع الخط .......

الساعة التاسعة صباحا .. النت شغال بطيييييييييييييييييييييييييييء بس بقوم يعني .. بيعكز...

الساعة العاشرة والنصف صباحاً... الكهرباء بتروح وتيجي في ثواني وورا بعض....

الحادية عشرة صباحاً...الكهرباء فصلت تماماًولمدة ساعة إلا الربع تقريباً في حي فيكتوريا ...

بعد عودة التيار الكهربائي فوجئت ان النت عطلان ؟!!!!!!!

النت عطلااااااااااان

يا خبر ابيض دا العروض اللي مستنيينها من بره في اروبا على الايميل ....دا احنا كنا لسه داخلين على شغلانة كبيرة في العيد الكبيرة فاهم يا ابو طويلة ؟!!!!!!!!!!!

طب اعمل ايه اسوي ايه...و المديريين عندي بيشدوا شعرهم .. فاكرين ان المشكلة في لينك....

الثانية مساءا... كلمت القاهرة .. افادنا مراسلنا على خط النار ... ان دا مغرز عامله فينا مليجي ....علشان يا خد بتار اخته اوشه .. اوشه .ههَ!

لحد الساعة 3مساءا ...لفاد مراسلنا ان خط مصر الدولي اتقطع ....بيني وبينكم افتكرت الكلام هزار ... والفار برطع في عبي ..

صل انا كنت لسه شايف فيلم على مودرن امريكا ..وخطوط التليفون فيه والموبايلات قطعت .... قام البطل قال لأخيه لو انا حبيت ادبح قرية يبقى دي اول خطوه ... وحوي يا وحوي ... ايووووووحه..

قلت لصاحبنا انت بتهزر....قال لا والله .. انا لسه مكلم مهندس الاي تي قالي كده ...واضح ان مصر ما دفعتش الاشتراك؟؟؟!!!

قلتله لأ بتهزر... يعني عاوز تفهمني ان الدولي مقطوع عن الرياسة وان الريس مش عارف يكلم الرؤساء الدول الاخري؟؟؟؟!!!!!!

الثالثة والنصف...صدمة خدمة العملاء

لينك مش بترد .. حاطة وشها في الارض ومش عارفة تقابلنا بأي وش .. مع ان الست مش مقصرة بصراحة معانا على الرغم من الاشتركات ام الثلاثة 45قرش والناس اللي واخدة وصلة منها وموصلاها لخماشر تمناشر غيرهم...لكن برضه لنك عمهم وحابس دمهم..

لكن الانكى بقى ان الSystems في كل حته واقعة يعني خدمات العملا .....باص ما فيش

سيستيمز الشركات اللي بيعتمد على النت .....بح ...خلاص ... ما فيش ...

تسعة باليل .. خبر في برنامج ع الهوا مع وزير الاتصالات ...

عرفنا وقتها ان الخط بتاع شركة فلاج وشركة تانية خطوط الياف ضوئية بتوصل النت

من اوروبا إلى مصر ودول الخليج -بتوع البترول والبورصة- وجزء من لبنان والاردن

وخلافه.

ايه اللي حصل يا ولااااااااااد؟

تم تشكيل لجنة لمعرفة مين السبب في الحب القلب ولا العين ، ااقصد مين السبب في انقطاع نفسنا العواصف التي لم نشهدها من قبل وتغيرات المناخ اللي متطمنش ؟!! ولا......؟!!حنرد على الموضوع ده في بوست آخر..كانت تلك التغيرات سبب في قطع خطين الالياف اللي بيعملوا ترانزيت في مصر والقطع كان على بعد 10كيلو متر من مدينة الاسكندرية في مياهنا الاقليمية المهم وعدنا السيد فلان وعلان وتلتان بتشكيل لجنة حلو قوي ...وقال ان النت حيرجع بقوة 70% النهاردة ....

حياخد قد ايه ....الموضوع كبير ...كبير..حوالي اسبوع

ما نا كنت عارف ....م انا كنت عارف.....

النهاردة النت شغال.. بس مش بقدر احمل الاميلات ...

عموما ما دام التدوين شغال... يبقى متشكرين قوي قوي ..وكتير خيركم...

يارب الموضوع ما ياخد اكتر من اسبوع ...

الحكاية مشكلة كبيرة ولازم شركات الانترنت تساهم بجزء من ربحها في اصلاح تلك الاعطال...ما هي اكتر واحدة مضرورة ...واكتر مستفيدة لو الخط رجع...

اقولكم على حاجة .. حاسة في نفسي بشوية شماتة ...تفتكروا ليه؟

اكمن انا من الناس اللي نفسنت في موضوع الاشتراك المحدود ابو 45جنيه

قلت للناس اللي حيشترك يبقى بيفرط في خطه واللي يفرط في خطه كأن فرط في اي حاجة

عموما أنا كان لي وجهه نظر ..

الخط اللي بتحمل 10الشركات طبيعي بتحمله 15 على اساس ان معظم المصريين ناس هايفه وبتستخدم النت في كلام فاضي _شات واغاني-وافلام-وبلا ازرق -

مافيش إلا قلة قليلة بتستخدمه في البحث العلمي وقطاع عريض بيدون...

قوم ايه لما عمله الخط الجديد انا قلت بس ما هو الشركات دي لازم تكسب يبقى حتحمل الخط الواحد 20بدل 15كمان

تفتكروا دا سبب يقطع الخط طبعاً لأ

طب تفتكروا الرياح والعواصف سبب ..أه ولأ

لأ : لأن المفترض أن الكابلات دي بتقى على اعماق بعيدة جدا واي واحد يعرف ان الرياح بتأثر على سطح البحر حتى عمق محدد وإلا كنا لاقينا اي شوية عواصف طلعت لنا حيتان على الشط- ربنا ستير-

وبعدين الكابلات دي بتبقى محطوطة في اشياء زي المواسير كده- على حد علمي العبيط- مضادة للمياه وعوامل الملوحة وترسيبات الاملاح ووووووالى آخره ودا يمكن شفناه كتيراليومين اللي عدوا على الناشيونال جيوجرافيك

طيب ايه اللي يخلي كابل من دول يفيص بسهولة ؟

هنا بقى نقدر نقول آه ونعم للعواصف الجوية- لا والله يا باشا عواصف دي مش بنت خالتي ومش مرشحة نفسها في الانتخابات ولا حاجة -

العواصف البحرية يبقى نقول الاهمال ..ز في نوع الكيبل او الشكل اللي اتريح بيه في قاع البحر وعدم وجود ما يدعمه

وكل الاحوال دا بيبقى إما قله فلوس مدفوعه من جهه مصر- او تلاعب بينا لأننا عرب وشرق اوسط غلبان وحركة زي دي تعرفنا مقامنا

(انتوا مش فتحتوا الحدود لغزة -اشربوا بقى يا حلوين حاصرناكم اهه بالنت المقطوع) عشان زعلانين ان الكهرباء مقطوعة عن غزة ...

و في حالة ان الفلوس مش كفاية

يبقى يا وزير الاتصالات لا عيب ولا حرام-بتكلم جد ولله-

لم فلوس من شركات الانترنت وعموما انا لسه دافع الاشتراك ومعملتش بيه حاجه

واكيد لينك ما لحقتش تفرتك الفلوس توكل على الله وخدهم منهم ... انا مش زعلان ...لكن ارجوك

اديني الوصلة بسرعة ...احسن محتاج الجرعة....

ولا عزاء للدايل آب ....

د.منوسي

يوم انقطع الخط....

وطلعت بيئة ...وطلعت بيئة

آه ..طلعت بيئة ..مبعرفش انجلش كويس


ابقى بيئة ولا لأ

معرفتش انطق ماي تايتل بالانجليش

ابقى بيئة ونص ...

لا..و ثلاثة رباع خلفي....زي المصورين



وكمان بقول كلمات كتير قوي عربي في كلامي تصوغوا بقى.. تصوغوا خالص ....

تصوغوا كمان إني معرفش المصطلحات الرياضية بالانجليش . ياااااااااااااااااااااااااي

سو بيئة سو بيئة.....

معرفش يعني ايه منقلة ..... معرفش يعني ايه مثلث ......

تفتكروا ممكن نتقدم كده وانا معرفش المعاني السامية دي ؟

ياي دا انا حتى بقول على الأكل صحي ......ياااااااااااي بيئة........صحي ....يعني زيه زي الصرف يضاف إلي كلمة صحي؟!!(حته لغة عربية) مبقولش هلثي ....

شفتون بقه أنا بيئة إزاي ؟

يا ألف مليون وكسة يا ألف بركة ع الجوازة السودة ...جوازتنا من التعليم الاجنبي....اشهدي يا حارة ....

تعرفوا انا ايه للي ناقح عليا - لا مش ضرسي- انا ناقح عليا قوي ان البلد دي باظت ...بجد ... لما يبقى اللغة الأم مش مهمة يبقى شكلها باظت على رأي عمنا طاهر..

لما تبقى اعلانات الوظايف والشقق ومراكز التدريب ومحلات الملابس والكريمات والشامفوهات... كلاته اكده بالانغليش يبقى بااااااااظت

عارفين ليه فرنسا مش قلقانة من نواحي تونس والجزائر والمغرب ؟ لأنها ضمناهم ثقافيا في جيبهم ... وشوية شوية فرضت عليهم القانون الفرنسي

حتى وحياتك لما تروح هناك .. تلقاهم قاعدين... ماشيين..... مثل الفرنساوييين ... وليس اكثر من استار اكادمي مثال....

البت عزيزة بدل ما تتكلم تونسي ... جزايري ... عربي .... بتتكلم فرنش .....

مش بقولكم طلعت بيئة ....طلعت بيئة ....و.............طلعت بيئة ....

بس ولو طظ في العاوزين يقتلوا ثقافتنا يعملونا عجين ما تعرفلوش طعم ولا ريحة ...

ايشي تعليم انجليزي.....وألماني.... وفرنساوي.... وامريكاني......ما فيس موزمبيقي؟ .... نفشي فيه موتش

يبقى باظت ولا لأ....وابقى انا بيئة ولا لأ.....؟؟؟

يعني مش مهم قوي ... يمكن مش مهم خالص ....ويمكن كمان عيييييييييييييب.....انك تقول ان الماذر لانجويتش بتاعت حضرتك عربي...

في اي محفل دولي ...او مقابلة عمل... اعملك نفسك ميت ...اقصد اجنبي.....اتكلم نص كلامك ... لأ كله ....بالانجليزي ... ويا سلام يا واد يا عبد الظاهر لو تحليهم بشوية فرينش وجيرمان ويا ليت انا وانتي عندنا ايتالي ....ومعاهم حبتين اسباني.....مفيش هنا حد هندي....

يعني يدرسلنا شوية انغليش ....

تصدقوا من كام يوم قريت في الوسيط انهم عاوزين مدير حسابات خبرة 5سنين على الاكل الكليل ويكون بيعرف تركي وعربي وانجليزي... ينفعش اسكندراني ؟؟؟!!!ما هي برضك لغة واصلها لهجة قبيلة اسمها اكالوني البراغيث بالثاء او بالسين الله أعلم

يعني واحد خبرة بقاله بس 5 -10سنين حيلحق يدرس تركي منين ؟ طب هو لحق يدرس عربي ؟ لغته الأم؟وانجليزي كلغة عالمية ؟

طب لما الامر كذلك وبيد أن إذا ليه مجانية التعليم ؟... ومن غير كلام حنجوري على رأي محمود السعدني ومع ان الكلام حيزعل شواشي البرجوازية العليا ...تعالوا ندرس الأمر...

تعليم يعني مناهج دراسية -مباني تعليمية- تلميذ ينفذ فيه المخطط الاجرامي اقصد التعليمي- مدرس - هئية تدريس - وخلافه

طيب ... تعالو بينا يالا احنا والشلة ... لا مش دريم بارك يا خفيف ...فرقع من قدامي احسلك ...لا ندرس تلكم العناصر دراسة تفصيلية مستفيضه في المحور التعليمي في الهرم العلمي للمنحنى اللي مش عارف ماله...

مناهج .........لا تعليييييييييييق (اهنا عارفين اللي فيها)

مباني ......الطالب محشور في كتلة خرسانية اسمها مدرسه فيها حوالي 5000طالب ويمكن اكتر ..محشور في فصل فيه 60-70طالب دا في ابتدائي بس يعني مرحلة تأسيس وارساخ الهوية العربية والقومية الخونفوشارية المصرية ....محشور معاه في التختة 3 .... حصص التربية الرياضية PS بقم يدوها لبتوع الحساب علشان يلحقوا يخلصوا المنهج وكذا بتوع التدبير والزراعة والصناعة .......

يعني عشان الواد من دول يدرس مواد مش فاهمها عن منهج عبيط يخدم واحد متخلف - من غير زعل - هدفه الأول والأخير افشال العملية التعليمية ، نهمل في الزراعة ...مع ان المناهج بتقول مصر بلد زراعية (ايه ؟ بقت سياحية ؟؟ معلش انا اصلي بيئة مش من هنا)

نهمل في الصناعة والواد من دول يجيب واحد يعملوا الحنفية اللي تخلص في ثواني يعملوا حكاية ويا خد 70في حاجة هايفة ما ان حمار مش فاهم حاجة... البنت من دول تتفاخر بانها مش بتعغف تسلق بيضة ... خلاص اشوي الفرخة من اساسه بقى ...او شغبيها كل يوم الصبح ميه سخنة مولعة وهي حتبيض لسياتك مسلوق ولوعاوزة مقلي اكليها معلقتين زبدة ودوسي على العرف بتاعها وهي حتعمل اللازم

يبقى باظت ولا لأ.... وابقى انا بيئة ولا لأ...

طبعا 1005 بيئة...........

د.منوسي

آخر يوم لي في العتمة

الثانية عشرة ...آخر يوم لي في العتمة
اخرج هذا اليوم...من قلبي الذائب في الظلمة
وارى نورا ناخر في أجواء الكون
وارى شمسا وأرى فجراً ...
لا لن أذهب لأرى بيتي..
فبتي سجان آجر من سجاني العتمة...
وغداً يوم آخر حلواً..
ارى فيه أناس أخرى
اتمرد داخل مني ..
واثور واهرب من نفسي
لبحار الضوء..
**********
أخر يوم لي في العتمة ..
كنت افكر يوم خروجي كيف سيصبح
لون الشجر ؟
هل يتبدل ؟ هل يتغير؟
هل يتقلب لون البدر ...من أجلي؟
*********
آخر يوم لي في العتمة
اغدا أخرج ام لا أخرج
سؤال صعب اداريه وأنا أقبع في سجني
فالأحيا حتى اليوم القادم
بأمل وضياء حتى
لا تقتلني الظلمة ....
********
أخر يوم ادفن فيه وغدا أحيا بلا خوف ..
أخر يوم أدفن رأسي ..
وسأحيا مرفوع الرأس
آخر يوم ادخل قفص ...
او سجن في قلب الذل ...
أخر يوم تقتل نفسي ..
وأنا مسجون في يأسي..

ابداً لن اقبع في العتمة..
وهناك بصيص .. من ضوء...

د.منوسي

مكيدة الرجالة في سكوتهم عن المرأة الشغالة،،

استكمالاً للبوست بتاع فوقوا يا ستات ...



وكما وعدناكم ...
الحلقة الأولى:


ليه الستات بقوا كده،،،



لماذا اصبحت الشكوى اليومية من الرجال ان مراته زي غفر السواحل او عسكري الدرج ؟



لماذا يقف الرجل من دول أمام هيفا ونانسي كأنهم تمثال عرابي وهم أبو الهول وام الهول وخالته كمان؟



بالمناسبة حد شاف نانسي قبل العملية على قناة فن فظيعة موووووووووت شكلها غلط وشبه مرضعة وابور الظلط



يعني من الآخر ايه اللي في الستات دي ومش في نسوانكم - كلمة لغة عربية فصحى- جميع المعاجم العربية-



الشكل : الفرق ان هيفا ونانسي وخلفاءهم لا زم ينزلوا متظبطين كده .. عرفين اديش ينصرف على اهاليهن لحين ما بقيو هيك ؟


الست من دول شبه صفيحة الزبدة- السمن الحلوب سابقا - تشوفها بالليل كالبدر المنور في الصبح شمس هالة


تفتكر يا ابو شنابات ليه؟.


فلوووووووس وواحد ديووووووووووث


بالعربي ومن غير قلة ادب اههه...


فلوس بيدفعها المنتج للولية من دول تقوم تظبط نفسها والتمن معروف للجميع ...يكفى انها حتقلع اكثر يعني رجالة حتتهطل اكتر يعني شباب حيخيب اكتر وريالة اكتر .. ريالة اه من رال .. سال رواله...


وادفع وظبط والفلوس حترجعلك بعد كام يوم من كام حفلة للست نانسي ولا هيفا ولا بلا ازرق من اللي طالعين جداد


الست المصرية : اللي مصريين بضم الميم يطلعوها رفيعة ..سمبتيك وشعرها اصفر سايح على ضهرها ... ولا شعرها احمر واخضر واصفر ...كيف اشارة المرور تماماً ... ومصريين على كده بردك بضم الميم ... لا هي كده ولا كده


الست المصرية دي أمي وأمك .. الست اللي ضاع عمرها كله فينا وبلا فخر علشان نطلعلها كده -اهبل خلق الله - لا لينا لا في التور ولا التورة -اخت التور- ست قضت عمرها كله قدام البابور - آلة قديمة تشبه الكانون -وووه - زي البوتاجاز بس بعين واحدة وبالجاز ربنا يعيذنا ويعيذكم من النار


وتقعد تغلي في كوافيلنا من أول يوم ما هو قبل ما يخترعوا البامبرز ...وتأكل وتراعي ونسيت انها إمرأة+ أن حماتها اللي هيا مامي بتاعت انت في كتير من الأحيان بتلوم عليها من وراك كده .. لو حاولت تتزوق على اساس انها ست قليلة الادب ...مش اتجوزت وخلفت ايه قلة الادب دي ...

أمي وامك كانوا عاجبين أبويا وأبوك والي خلفونا كمان ... لكن دلوقتي الراجل من دول بيدور على مزة ..مزة يعني مش مطرمة ولا حاجة

المهم المزة دي كانت مزة واصبحت تروماي ليه؟ لأنها كانت ممزمزة بس عشان تظبط واحد من جنس ابو شنبات

قوم ايه أول ما تم المراد .. بقت مراد

والست شايفة أن جوزها مهما عملت مش شايفها هو شايف المزز الطحن اللي عمليين يتلووا كيف الحنكليس ولاٌ أناكوندا عفية لسة شباب

تعملة شعرها اصفر .. يقولها شايف النسوان .....

تعمله احمر يقولها .. يا سلام على شعر نانسي الاخضر ..شوفي جمالها ...شوفي حلاوتها شوفي شوفي

الولية الغلبانة جالها اكتئاب ....يبقى بقى مش مهم عندها زيد زي عبيد زي الجلابية ام زيت
عموما أنا مش بعمم انا بتكلم على اغلبية الحالات التي صادفناها في الحياة ... والسبب الاعلام ...
قولوا معايا يا ستات ... تسقط نانسي (تصوروا انا بكتب وهي بتغني في كاسيت الحيران يا اطبطب يا ادلع )
تسقط هيفا وهبي ... لو انها جامدة يعيني... تسقط المزز المتظبطة
د.منوسي

منوش أخود.منوسي حتعمل بلوج يا رجااااااااااااااااااالة

منوش دي مش دا حتعمل مدونة منوش اختي الكبيرة العزيزة ...
لأ شعرها مش اخضر يعني ولا عيونها صفرا .. أمال الهيصة دي كلها ليه؟
لأن منوش كما يحلو لي ان اناديها ... من اكثر الناس بركة في الكمبيوترات
يكفي انها تلمس الكي بورد حتى تعم البركة ....(شكلي حنام ع المشاية النهاردة)
لكن على اي حال وبحذركم اهوه إلي مش حيدخل مدنوتها اول ما اعلن عنها
يقول على نفسه (يا رحمن يا رحيم )
منوش اه يا منش مننيشو .. العب يا منش
عاوزة هتاف يسد عين الشمس ..ولايعني مرشحي فكر جديد لانج احس منها
عاوزة عدد زوار مهول ...عايزين نشجع اللبنته ...
خصوصا إن فرحها على سبعاوي الجربان قريب
سبعاوي مين ؟؟!!
عمركش سمعت عن مطاريد الجبل اياك؟
عموما وبدون تطويل قول طول
منوش حيعمل مدونة ...تصفيق حاااااااااااااااااااااااااار
منوش باشا يا بلاش واحد غيره ما ينفعناش
منوش منوش ... نورت الدائرة ..اقصد المثلث - ما فرقتش يعني -
البلوجز كانت من غيرك ضلمة
يا لا يا منوش
انت عمهم ... انت عمهم .... وحابس دمهم.....

د.منوسي
احتفالية بقرب صدور مدونة منوش

حايات جدتي

كان يا ما كان ولا يحلي الكلام

إلا بذكر نبينا - عليه الصلاة والسلام-

حكت لي جدتي- رحمها الله -

انه من آثار رحمة الله

انه يحكي أن امرأة ماتت وهي حبلى

ودفنت على حالها

وحينما علموا انها دفنت وهي حبلى

فتحوا اللحد ليجدوها وقد احيا الله لها

عين واحدة وذراع واحدة وثدي واحد ارضعت به الطفل الصغير

وكبر الصغير ولم يمت ....

سبحان الله

د.منوسي

حكايات جدتي

فوقوا بقه يا ستات ...

بجد زهقت ...حمار مين اللي قال الست تنزل تشتغل

حلوف مين اللي قال أن دي هي المساواة،،،،،

اكيد واحد من المكتوبين في شهادة الميلاد ذكور لأسباب بيولوجية فقط

منه لله اللي نادى بعمل المرأة ادعو معايا يا ستات

اكشفو راسكو وادعو عليه

ادعو عليه في كل صلاة وعلى كل فطار واندبوا حظكوا العاثر بالتار

وردا على بوست اخونا أبو أمك حكمل الكلام ومن غير زعل الست اللي بتشتغل دي احدى حالات يمكن كتير من اللي علقوا على البوست بتاعك لموها

بس في الاول احب اقولكم طظ في اللي نادى بعمل المرأة ماتقولوا اتخرستوا ليه يا رجالة الوطن

حنتكلم هنا عن لماذا تعمل المرأة :

- أن الحياة صعبت قوي وبقى ازازة الزيت ب 8 جنيه ، ممكن اي شنب فيكم يقولي مرتبه كام .

-مع صعوبة الحياة والضغط الشديد على الزوج من الناحية المالية ومعظمها اسباب لا دخل للزوجة بها - انا بتكلم عل الاعم مش الريجولار - (ايجار البيت ولو لسه الوالد خضار يبقى ساكن ايجار جديد اقلها 100جنيه على افتراض ، فاتورة الكهرباء (وبقلوها في مصر النور) 50جنيه ، الغازاللي حيتقطع عننا كمان كام سنة 20جنيه، التليفون سواء عادي او محمول 50جنيه دا بس اساسيات المسكن من غير اساسيات المعيشة من لبس واكل وخلافه احسبهم اللي يكرمك يبقوا كام يا والد يا متولي كام؟؟؟220 جنيه وقول كمان سبعين جنيه علشان قهوة المعلم ا لزوج والسجاير وخلافه يبقى دخلنا كده في 300جنيه عدا ونقدا ابو شنب بقى دخله في الشهركام ؟!! 500جنيه يعني حنقول 1000جنيه طب تعالى نشوف

معظم الناس بتشتكي من الغلاء ازازة الزيت ب 8.30حرقاني قوي دي واللبن ب4 جنيه الكيلو - اللي مش مجنس ولامخنس- الخضار اي نوع الكيلو لا يقل مجمد او حي عن 3 جنيه - بالهرمونات من غير بيوصل في كارفور 7جنيه واكتر-يعن لو حسبنا اكل وشرب ومصاريف المسكن المعيشي دا غير المواصلات وغير مصاريف المدارس والكتب الخارجية والدروس الخصوصية ما يجعل المرأة ترضخ امام تلميحات الزوج - بيشترطوا دلوقتي انها تكون بتشتغل قبل الجواز وبعد- وامام تلميحات ام الزوج وخواته وجيرانه واللي الناس الحلوة اللي جايه تولع فرح الليلة والقاصي والداني واللي ان شاله عنه ما جاني ان تنزل لسوق العمل .

لاحظ هنا معي اننا لا نتكلم لا مؤاخذة عن اسعار -الميكب وخلافه لزوم الدلع يعني والملابس (جوه وبره البيت).

- الامر التاني : تلك الشعارات اللي رفعها الاعلام وصدقتها امهاتنا في الستينات والسبعينيات عن المساواة وان سلاحك في ايدك شهادك واللي ما يحطكش كحل في عنيه ما تلبسوش شراب في رجليك واغلبيه بالعيال وان الراجل لما القرش بيجري في ايده حيلوفك ع غيرك فالحقي قصقصي ريشه وتلحقي فروة اهله ، مرورا بكتر الخلفة يهد حيل مراتك لما قطعوا نسل اللي خلفونا واسرة صغيرة تساوي حياة افضل وشعارات هم ما يتلم من هنا لآخر بوست ف العالم .

وبالتالي احنا صدقنا تلك الشعارات او بالاصح رضعناها مع لبن الام

-الثالث : فئة المطلقات والارامل واللي لسه ما جالهاش العدل - لا مش العدلي ما تودوناش في داهية- هذه الفئة مظلومة من المجتمع

مين حيصرف عليها بمن فيهم اللي معاشها ميكفيش عيش خاف ، واللي مالهاش معاش واللي معاش اللي يزعلك ما لهاش حد سائل فيها.



الرابع: الفئة الهاربة من المجتمع: ودي بقى معظمها مثقفات أما بلغة المجتمع عوانس أو ارامل يعني ممكن تلطش المحروس او مطلقة ودي ست مش كويسة مش تستحمل قرف جوزها بدل ما تطلق وتقرفنا احنا في جوازنا؟!!
الخامس: فئة تعمل عشان متطقش والموضوع ده الرجالة فهمينه كويس راجع من الشغل طهقان زهقان متضايق الولية لاغلبانة قاعدة تستنى محروسها من الساعة 10بالليل المحروس راجع وش الفجر او 1باليل لو الاوبرج قفل بدري، المحروس راجع ضارب بوز ، مش طايقها وهي مش طايقاه ، استحالة الحياة ، ما يبقينا عليها الشكل الاجتماعي والاولاد ، تخرج للعمل ومع اني لا اعذرها لكنه برضه سبب.

مع كل ما تقدم نصيح بأعلى الصوت::: طظ في اللي نادي بعمل المرأة في غير مكانها
يسقط عدو المرأة ..يسقط ...يسقط...يسقط
اما النتائج الترتبة ففي البوست القادم (ليسه الستات بقوا كده / ماذا حدث لأبو شنبات / ليه الرجال فرحان بعمل زوجته/ هل هي أزمة مالية أو أزمة في الفطرة) كل هذا واكثر في الأسبوع القادم
وبوست جديد لد.منوسي

أنا زعلان

بجد أن ازعلان وبحاول جاهداً أخبي زعلي
زعلان لن مافيش حد علق على البوستس بتاعتي
زعلان لأن حال البلد ميسرش
زعلان لأن الهرم الاجتماعي اتقلب
القوالب نامت والانصاص قامت
زعلان لأني نفسي نقيس الناس بالنفوس والاخلاق والتقوى مش بالفلوس
زعلان لأن فيه ناس بتموت كل يوم في كل حتة في بلدي ولا يحرك ساكنا
زعلان لأن الثراء بقى للأهبل واللي يقدر يستهبل اكتر ويقلع اكتر
زعلان لأن ما عدش فيه رجال اعمال بيتبنوا شباب عاوز يكون ومش قادر
زعلان لأن نسب الجرايم المتعلقة بالشرف بتزيد مع ازدياد حدة الافلام القذرة واللي بقولوا عليها جريئة
زعلان لأن ولاد بلدي بيموتوا في البحر والعبارة والقطار وعلى الهاي وايز والوايز العادية وفي البلاد التانية
وكله على عينك يا تاجر واحنا بمشاكلنا بنتاجر
نعمل افلام عن ناس ساكنة في فيلات وبوديجاردات رايحين جايين وراهم
ولما نحب نجيب سيرة الناس الغلابة
نطلعهم اللي عايشين في عشش وشواذ ورقاصات ومدمنين
زعلان لأن الناس بقت كل همها (ان بيت ابوك وقع الحق خد لك طوبة )
زعلان أن كل واحد مش هامة غير نفسه وبس
زعلان ان فيه ناس حشرية بتدخل فيحياة الآخرين معتقدة انها بتحل مشاكلهم
ودول يا اما مصلحجية
او باردين حشريين ..
زعلان ان لسه في رجالة عايزة تتجوز مانيكانات
ويقولك تتدين بعد الجواز
زعلان ان لسه في بنات بتغمز وتلمز على صاحباتها اللي لسه ما اتجوزوش
زعلان ان التعليم بايظ في البلد والشباب خارج من الجامعات مش لاقي فرص عمل ولا نوادي يفرغ فيها فراغه
زعلان ان الشباب ملاحق مش لاقي نادي ولا مركز شباب عدل ما فيهوش غرزة
ملاحق لو دخل حزب سياسي
ملاحق لو انضم لجماعة الاخوان
ملاحق لو انضم لحركة كفاية
ملاحق حتى لو انضم للجزب الوطني لأنه متهم بانه باع دماغه وسلم اوراق القضية
ملاحق لو دون
ملاحق لو دخل المسجد وربى لحيته علشان سنة
ملاحق من الاعلام الفاسد
ملاحق من نظريات المؤامرة اللي جاهزة
ملاحق من الداخل والخارج
مستهدف من الجميع
زعلان لأني عندي 27سنة ومش عارف اتجوز ولا افتح بيت
زعلان لأني عندي 27 سنة وطموحي اتوأد في المهد
زعلان لأن عندي مهارات لو لقيت حد يتبناها ويصرف عليها ممكن افيد البلد
زعلان لأن التاريخ اتزور والحرامي (بقى ظابط يا أمه)
والظابط بقى ........
زعلان لأن بلدي ما عدتش بلدي اللي حلمت بيها زمان
شايلة طرحة العروس وبتعدلها الفستان
زعلان لأني فقت على واقع أليم
العروس بتنقتل والدم غرق الطرحة
زعلان
زعلان
زعلان
ان الفقر نهش في الابدان وفي واحد من العرب على قائمة اغنى البشر في العالم
زعلان
زعلان
زعلان
ان غزة بتموت وفلسطين كل يوم بيتاكل شبر منها واحنا لسه بنشجب وبنعترض
يا أيها الشاجب والمعترض .........
احترم نفسك شوية
اكلوك الاونطة والقضية
هي هي
زعلان اضرب راس في حيطة
خبتنا بقت قوية
ولادنا بيسألونا
هي مش فلسطين عربية ؟
كفاية ضحك على الدقون
ووقفوا المسرحية
الممثلين بلياتشو
والجمهور الضحية
يا أيها الشاجب المعترض
احترم نفسك شوية
الناس كلت وشوشنا
دا احنا اصحاب القضية
يا أيها الشاجب المعترض
أقولك .....
وشك في الحيط وقفاك ليه.
د.منوسي

ح قولك ايه؟

حقولك ايه؟
حقولك ايه واعيد تاني وكل الدنيا منعاني
اقرب في الحنان منك وقلبي لوحدة بيعاني
حقولك ايه وان عصفور مكسور في ليل الريح
حقولك ايه وانا مسجون بأحلامي وقلبي جريح
وليه اكدب واقول إني بصاحب في الطريق حزني
دا حزني بيا وكأني عرفت الدنيا بيه مجبور
حقولك ايه؟
كتير الحمل فوق كتفي وقولت الحلم حيكفي
وشايل قلبي فوق كفي وقلبي مالتقاش النور
حقولك ايه؟


كلمات أغنية هشام نور حقولك ايه؟
ياريت تعلقوا عليها وتقولوا رأيكم فيها في زمن كل كلماته عن الواوا والبح و والبلح والعنب وكل فاكهة الصيف

أحلامي

يقولون أن الأحلام هى انعكاس حالتنا الشخصية والمزاجية ،،

اسير في شارعنا الضيق ، يلهو الصغار وفجأة تجد طوبة ضالتها على مؤخرة رأسي ،،،
اجد شعري وقد بللته الدماء وجعلته متشابكا ، استشعر في نفسي اني بخير واستشعر في وجهي لمحة استياء، اجدني في المستشفى وقد وقفت انتظر دوري لخياطة الجرح ،، يدور في خاطري فكرة أن يحلقوا شعري فاطمأن نفسي انهم اذا ارادوا اكيد سيحلقون الجزء الدامي فقط المصاب
وقفت انتظر الطبيب وما من مجيب فرغ من اخر مريض له ولا ادرى اين كنت انا وعندما عدت سألت الممرضة عن الطبيب وذهبت وراء جموع الأطباء أسألهم عن الجراح دلوني عليه ورجعت البيتويبدو انه قد دوى الجرح احكي لأمي وأختي ما حدث لكني كنت اشعر ان بكلامي قليل من كذب ....

حلم
د.منوسي

حين...... مسخرة ،،،،أعزائي المخربين ...أقصد المخرجيين ..لستم انتم المثقفون.......

م الأول واللي مش عاجبة بقى يروح يروح ...
ومش عاوزة حد يقولي ..اصلها اسلامجية ...لأني حناقش الكلمة دي بعدين ،،،،

تعالوا نرجع بالذاكة ورا كده يجي 10 -15 سنة ...كان يا مكان كان في فيلم -محدش يسمع بيه إلا المخضرمين أمثالي- اسمه حمام المناطيلي...وقبل ما حد يتهمني بالاسفاف اسمعوا انا شو بدي نقول...
الفيلم دا - اللي عمري ما شفته - يحكي قصة رجل شاذ وامرأة خاينة ...عادي يعني ما كل أفلامنا اليومين دول على كده ..جبتش التايه يا خي؟؟؟!!
لحد هنا الكلام انتهي ... لأن هذا الفيلم قوبل بمعارضة شديدة أيام السبعينات -لا حظ أنها فترة الميكرو والميني جيب ونبيل صحبي اللي ببيفرجني صور العائلة واحمد رمزي اللي بيعلمني بيانوا - هذا الفيلم لا يذكره كثيرون الآن على أساس أن الفيلم مس أحد التابوهات المقدسة - والتي احترمها- الدين والجنس
اقول أن هذا الفيلم ضاع في مزبلة التاريخ ........
من حوالي 30 سنة عرض على الرقابة فيلم اسمه او قصة فيلم النعامة والطاووس -معرفش كان اسمه ايه وقتها- الرقابة الحكيمة رفضت وقالت مش ممكن نناقش الفيلم في السينما ..هذا الفيلم اخد موافقة من الرقابة وتم تصويره وعرضه من يجي 7 سنين كده ان لم تخونني الذاكرة،،،ومين اللي دخل الفيلم ؟؟؟؟!!! اعتقد ان اللي درسوا اقتصاد او اللي درسوا اي حاجة في اي حاجة تتعلق بالبيع -يعني اعلام تجارة سينما مالتي ميديا حلويات يعلموا جيدا ان هناك ما سموا القاعدة المستهدفة- ودي بقى مالهاش دعوة بقاعدة ابن لادن اهبط يا بوش ما صدق مسك في الكلمة- القاعدة المستهدفة اقول انا الشريحة التي يستتهدفها المنتج وفي هذه الكييس- الفيلم السنيمائي- يستهدف بالضرورة المقبليين على الزواج او المتزوجين ويعانون مش مشاكل في علاقاتهم الزوجية ...مين اللي دخل الفيلم؟؟؟؟؟ 95% شباب كلهم شباب ما بين بنات - على اساس ان مش فارقة معاهم وبيضحوا بسمعتهم...
الناس هاجت وماجت او ما عرض الفيلم واتكلموا علىه في الصحف والجرايد اكتر ما تكلموا على اللي تنفضح - ووترجيت-
وبعدين......نسيوا

بعدين بشوية طلعت علينا المأسوف على شبابها - المخرجة الواعدة الصاعدة الخ إلخ عل رأي اسماعيل بوند ،طلعت علينا بفيلم اسمه كلام الليل .. ونحن كما نعلم جميعا في بلد كلام الليل الي مدهون بزبدة يطلع عليه النهار يسيييح ...الفيلم كسر التابوهيين المقدسسين الجنس والسياسة ونوقش ايضا الفيلم واعترضنا وشجبنا و....اعلي ما في خيلنا ركبناه واتعرض الفيلم ..ومين اللي دخلوا؟؟؟ ارج سبع سطور وانت
تعرف....

إلى الان وكلوا عارف القضية - لاحظوا اني بتكلم عن الكم سنة اللي فاتوا يعني من 7سنين لما فوق - التقل جي ورا-
لكن مربط الفرس وما طولش عليك اقول طول.... ما حدث واستفزني وطرقع نافوخي وخلاه زي نافورة ميدان زويل بيجيب ميه من كل حته بيرشح يعني .... مقابله تمت بعد الكام فتوى التقال بتوع رضاع الكبير وبول النبي صلي الله عليه وسلم وهوجة وزير الثقافة لما اتكلم عن الحجاب ..استضاف البيت بيتكم - مش بيتي انا- مجموعة من عينات مخرجي هذه الأفلام وبالتحديد اللي غاظني - أنه استضاف خالد يوسف - مخرج فيلم حين مسخرة وويجا والله اعلم يمكن الجديد يبقى اسمه اقلع واجري- المذيع في البرنامج كان تامر افندي امين كان يصف هؤلاء الشرذمة أنهم مثقفون ...لما دول يبقوا مثقفين البلد أمال راح فين اسامة الباز ومصطفى محمود وزويل ومستجير وانيس منصور وغيرهم......أحمد خالد توفيق ونبيل فاروق يبقوا ايه ؟؟عرايس ماريونيت؟؟؟؟؟
انا ميهمنيش الحوار اللي تقال اللي يهمني ان يصبح اصحاب الفكر العاري والتجسيد المبتذل وهدام التابوهات والطواطم هم المثقفين ومفكري هذه الأمة ....
اللي اختشوا فعلا ماتوا ... وفي الحمام برضه
آثروا الانتظار والموت حرقا على الخروج عرايا ... ايه الاخبار يا عم شاهين ،،، عم خالد ؟ صبح صبح يا عم الحج
اصبحت مصر الآن هي ...الصحفي الشاذ والبنت الغلبانة الشاذة وراقصة...لا ... يا عبده ايه اللي وصلنا لكده يا عبده
مصر مش العربيات الفخمة ومش برضه الغلبانين الفقرا اللي كلهم رقاصات وشواذ ومصر مش كلها متعصبيين ومحششين وتجار كيف ومدمنين جنس ومغنا ...
مصر فيها عمال وبنايين فقرا صحيح لكن الواحد فيهم يقولك انا يفرومني اطوموبيل بس مرتي تعيش بكرامتها ...إلا العرض يا ولدي ...دا شرفك يا بوي
عموما الموضوع مش حينتهي في بوست ولا اتنين
اصل الموضوع دا حيبقى حملة
أنا مدون أرفض أفلام الجنس والشذوذ
ومش عاوزة حد يقولي دا الواقع
الواقع مش فيلم حين مسخرة وهي فوضى ...لأنها فعلا بقت فوضى وخلوا هؤلاء ال...تابو هم الآخرين يعني يوسف شاهين ضد النقد اللي يغلط في خالد يوسف اقصد في فيلم ليهم يعني يبقى مخرب ومتخلف واسلامجي -سلملي على البتنجان-
هم مش طواطم ومش بيعملوا حاجة عدله وشوفوا معايا فيلم ذا سليبرز
ايوة بتاع براد بيت ومش ححكيه ومن الآخر لأن ايدي تعبت من النقر على الي بوورد والدنيا ساقعة وانا شربت شاي يكفي زوار المدونة كلهم
الفيلم ناقش قضية الشواذ بس عمري ما اتكسفت اشوف الفيلم وكان له قصة - سلملي على خيانة مسروعة انا مش ناسية الشين هي فعلا كل اللي في الفيلم مساريع للقتل والخيانة
وللعلم يعني نوتا بينا على رأي الاجانب : كلمة خيانة ليست مرادف لما يحدث في افلامنا العربية الكلمة الصحيحة هي والعياذ بالله زنا
د.منوسي

الصمت مرادف ءاخر للحرمان

والصمت مرادف آخر مدمي للحرمان

ما عاد في العمر بقية

لن يطرأ في عقلي ابدا

ان أبحث بعد اليوم

ف حل لقضية....

اليوم كنت ادون افكاري فوق جدار العمر

سقطت اشياء على رأسي

وسقط العمر

الآن ما عدت أحلم بغد أفضل

او واقع يحتضن اللآلام

اصبحت الآن أنا ألماً

يطعن في قلب الحباب

سقط جداري

ما عدت اعرف لي عنوان

بت ليلتي ابحث في حطاما

عن مثلي

كان لهم احلام

اشلاء

اشلاء

تصادفني في كل مكان

لست انتم

يا من كنتم بالامس

ملئ الأذهان

اليوم خرجتم من البيت

تحت الأكفان

شكرا للقادة

شكرا لوزير الاسكان

فالعمر مر هنا لحظة

ورحل على غير اوان

شكرا للقلم الساخر

والصحفى يفجرني مثل البركان

شكرا للاعلام الزاهر يرثوني

وينعي الاحزان

شكرا وعزائا مقبولا

شكرا يا أم الأوطان

الناس كلوا وشي من المياه المعدنية

،،،،،،،،يبدو أنه ومن الواضح موضوع المياه سوف يطول في مصر

من ثورة الأهالي لعدم توافر مياه الشرب

إلى المياه التي دخلت عليها تسريبات الصرف الصحي

مرورا بالعبارات والسيارات التي تغرق في المياه يوميا وفي الترع

والافراد والحيوانات النافقين في المياه سواء بحار او أنهار

وظاهرة الاحتباس الحراري( اللي الناس مش عارفة هي ايه )

معتقدين ان هذا الأمر سوف يؤثر سلبا على المناطق القطبية شمال وجنوب الكرة الأرضية فقط ...

وأخيرا وليس آخراً المياه المعدنية ..................................

وحدث ولا حرج

الاسبوع الماضي وتحديدا يوم سقوط العمارة المنكوبة في لوران شرق الاسكندرية بمصر؛وعلى القناة الفضائية المصرية والأولى الارضية أذيع برنامج البيت بيتك وفي أثناء الحوار لا حظنا الشريط الاخباري على منتصف الشاشة يذيع أن الدولة اكتشفت أن بعض شركات المياه المعدنية تحتوى على مواد ضارة بالصحة وغير صالحة للاستهلاك الأدمي ....إلى هنا ويبدو الخبر عاديا لكن الغريب هو أن البيان لم يشر إلى أنواع وماركات المياه الموضوعة تحت المجهر أو التي تم التشكيك فيها ........

ولم يعترض أحد ولم يعترض المذيع اللامع تامر أمين وكأن الخبر لم يكن؟!

الأغرب هو البيانات أو التقارير التي لم تذاع عن عدد الشركات وأسماءها وما وجد فيها

في ظل المطالبة بالشفافية لا يجرؤ جورنال مثل الأهرام أن ينشر في الصحف الأولى مثل هذا الخبر؟ ولم ينشر من أساسه إلا بعد مضي يومين على هذا الاعلان .

طب اقاطع بركة ولا اكوا سيوة ولا سيوة ولا حياة ولانستليه ولابيبسي ولا ولا......

كان من الأحرى أن نكتب على الشاشة أن شركة كذا وكذا متهمة او لا نكتب من الأساس إلا بعد التأكد لأن هذا يضر بمصالح الشركات وأيضاً يسبب البلبلة للمستهلك ، ثم ليه هذا التهميش من جانب الأهرام ؟أنا ليا بعض أسألة وأرجو ان أجد لها ردود عند الأهرام:

1- لماذا لم يتصدر هذا الخبر الصحف الأولى باعتبار انه يتعلق بصحة المواطن الذي هو عماد هذ ا البلد؟

2- لماذا كتب بحروف صغيرة ومانشيت صغير ولا يتعدى ال10سطور ؟

3- الاعلان عن الشركات التي تم اكتشاف انها تنتج مياه غير صالحة للاستهلاك الادمي كان لا بد ان يتم بطريقة القوائم وأن ينشر معه -إذا أردنا الشفافية - صورة موقعة من اللجان المختصة التي اشرفت على هذا التحليل حتى لا يعتبر الامر تصفية مصالح أو تشويه لأحد الشركات على حساب الأخرى.

ثم لماذا لم تدان الشركة المشهورة في التساؤلات أو القضايا - لا عرف إذا وصلت المحاضر إلى القضاء أم لا- التي وجهت ضدها ولم نجد تقارير تشجب وتعترض على صلاحية مياه هذه الشركة الغازية للاستهلاك الآدمي . وللعلم هذا ليس كلامي (لو حد شاف أنا والناس لحسين فهمي حيعرف أن دا كلام واحد محامي عرض بعض الحالات لوجود حشرات في زجاجاتها وتقديم محاضر بها).

والتساؤل الأخير مقدم للمعنيين بالأمر، لأن الأمر جد خطير ولا نريد ان تخرج علينا الصحف القومية غداً بقوائم للمرضى أو الموتي التي تسببت في وفاتهم تلك المياه المعدنية او هذه المياه الغازية.

وربنا يكفينا واياكم شر البلاء و.......

يجعله عامر.

د.منوسي